அனுபவத்தையும் அறிகுறிகளையும் வைத்து எப்போது மாதவிடாய் எப்போது தொடங்கும் என்பதைக் கிட்டத்தட்டத் துல்லியமாகக் கணிக்கலாம். இப்போது, மாதாமாதம் எப்போது மாதவிடாய் வரும் என்பதைக் குறிப்பிட்டுக் காட்டும் செயலிகளும் வந்துவிட்டன. சில நாட்கள் மாதவிடாய் தாமதமானால் நீங்கள் கர்ப்பமாக இருக்கிறீர்கள் என்று பொருளா?
உண்மை இது தான்! சீரற்ற கால சுழற்சியில் மாதவிடாய் ஏற்படுவதற்கோ, மாதவிடாய் தாமதமாவதற்கோ, பல்வேறு காரணங்கள் உள்ளன. நீங்கள் கர்ப்பமாக இருக்கிறீர்கள் என்று சந்தேகித்தால், கர்ப்பப் பரிசோதனை செய்து அதனை உறுதிப்படுத்திக் கொள்ளலாம். இது மிகவும் எளிது தான்.
அப்படி கர்ப்பம் இல்லை என்று உறுதியானால், மாதவிடாய் தாமதமாக பொதுவான 10 காரணங்கள் என்னென்ன என்று காணலாம்.
1. மன அழுத்தம் / Stress
முதல் காரணம் இதுவாகத்தான் இருக்கமுடியும். ஏனெனில் இன்றைய சூழ்நிலையில் நாம் வாழும் வாழக்கை அப்படி. நம் ஆரோக்கியத்தைப் பல வழிகளில் பாதிக்கக்கூடியது மன அழுத்தம். வயிற்றுப் பிரச்சினைகள், உடல் எடை அதிகரிப்பு என பல்வேறு விளைவுகளுக்கு மனா அழுத்தம் தான் முக்கிய காரணம். அதனால், இது மாதவிடாய் சுழற்சியையும்பாதிக்க வாய்ப்பு அதிகம்.
மன அழுத்தம் முன்கூட்டியே வரச் செய்யலாம். மாதவிடாயைத் தாமதப்படுத்தலாம். மாதவிடாய் நாட்களை அதிகரிக்கலாம் அல்லது மாதவிடாய் நாட்களில் வலியை வழக்கத்தை விட அதிகமாக்கலாம்.மன அழுத்தத்தின் போது ஹார்மோன்கள் மிக அதிகமாக உற்பத்தியாகிறது. இதனால் செரிமானக் கோளாறுகள் கூட ஏற்படும்.
Also Read: மகிழ்ச்சியாக இருக்க வேண்டுமா? தினமும் வெறும் பத்து நிமிடம் ஒதுக்குங்கள்
2. உடல் நலக்குறைவு / Illness
நீங்கள் கருவுறத் தேவையான கருமுட்டை வெளியிடப்படும் நேரத்தில் உடல்நலமின்றி இருந்தால் கூட மாதவிடாய் தாமதமாகலாம்.
3. உடல் எடையில் மாற்றங்கள் / Weight gain or loss
உங்கள் உடல் எடையானது ஏறுவதோ, குறைவதோ, மாதவிடாய் சுழற்சி உள்ளிட்ட பல்வேறு உடல் செயல்பாடுகளைக் கட்டுப்படுத்தும் ஹைப்போதலாமஸ் சுரப்பியைப் பாதிக்கிறது.
உங்கள் எடை திடீரென அதிகரித்தால் ஈஸ்ட்ரோஜென் ஹார்மோன் உற்பத்தியை அதிகரிக்கும். திடீரென எடை குறைந்தால், அது ஈஸ்ட்ரோஜென் ஹார்மோன் சுரப்பை குறைக்கும். அதனால் தான் இந்த இரு வகை மாற்றங்களுமே அனுபவம் உள்ளவர்களால் கூட கணிக்க முடியாத மற்றும் ஒழுங்கற்ற மாதவிடாய் ஏற்படக் காரணமாகக்கூடும்.
Also Read: உடல் எடைக்கும் மெட்டபாலிசத்திற்கும் என்ன சம்பந்தம்?
5. உணவுமுறை / Diet
உடல் எடை கூடவும் குறையவும் உணவு முறை தான் காரணம். உங்கள் உணவு முறையை மாற்றுவதும் உங்கள் மாதவிடாய் சீரற்றுப் போகக் காரணமாகக் கூடும். மிகக் குறைவாக சாப்பிடுவது அல்லது மிக அதிகமாக சாப்பிடுவது கூட காரணமாக இருக்கலாம். வெளிநாடுகளுக்கு சுற்றுலா செல்லும் போது வெவ்வேறு வகையான உணவு முறைக்கு திடீரென மாறுவது போன்றவையும் மாதவிடாயைத் தாமதிக்கலாம்.
4. தூக்கம் / Sleep
மாதவிடாய் சுழற்சியை சீரற்றதாக்க தூக்கமின்மையும் முக்கிய காரணம். உங்கள் உடலின் உயிரியல் கடிகாரத்தில் (Biological Clock) ஏற்படும் மாற்றங்கள் உங்கள் இனப்பெருக்க ஹார்மோன்களைப் பாதிக்கிறது. கருமுட்டை வெளியீடு மற்றும் மாதவிடாய் ஆகியவற்றின் மீது தாக்கத்தை ஏற்படுத்தலாம்.
6. அடிக்கடி வெளிநாடு பயணம் செய்வது / Traveling across different Time Zones
இனப்பெருக்க ஹார்மோன்கள் செயல்படும் நேரமும் வெளியிடுதலும் ஒளியைச் சார்ந்திருக்கிறது. அதனால், வெவ்வேறு நேர மண்டலங்களில் அதிகப் பயணம் செய்வதால் கருமுட்டை வெளியிடுதல் மற்றும் மாதவிடாய் சுழற்சி தற்காலிகமாக மாறக்கூடும்.
7. உடற்பயிற்சி / Exercise
உடற்பயிற்சி செய்வது நல்லது தான் என்றாலும், அளவுக்கு அதிகமான உடற்பயிற்சி செய்தால் உடல் போதுமான ஈஸ்ட்ரோஜென் ஹார்மோனை உற்பத்தி செய்ய முடியாமல் போகக்கூடும். தீவிர விளையாட்டு வீராங்கனைகளுக்கு மாதவிடாயின்மை ஏற்படும் அபாயம் ஏற்படலாம். இவர்களுக்கு சில மாதங்கள் வரை கூட மாதவிடாய் வராமல் போகக் கூடும்.
தொடக்கத்தில் குறைவாக உடற்பயிற்சி செய்ய வேண்டும். பிறகு ஓரளவு அதிகரித்து உடற்பயிற்சியை தொடர்ந்து செய்தால் மாதவிடாய் தொடர்பான பிரச்சினைகள் இருக்காது.
8. மருந்துகளின் பக்கவிளைவு / Side Effects
பல்வேறு ஆங்கில மருந்துகள் பக்கவிளைவுகளை ஏற்படுத்துபவை. கருத்தடை மாத்திரைகள் எடுத்துக்கொள்வது மாதவிடாயில் அதிக மாற்றங்களை ஏற்படுகின்றன.அதனால் ஏற்படும் பக்கவிளைவு மாத்திரைகளை நிறுத்திய பின்னர் சில மாதங்கள் வரை மாதவிடாய் சுழற்சியை சீரற்ற முறையில் வைத்திருக்கும். வேறு வகை மருந்துகளும் மாதவிடாயைப் பாதிக்கலாம். ஆன்டிசைகோடிக்ஸ், தைராய்டு மருந்துகள் ஸ்டிராய்டுகள் போன்ற மருந்துகள் உங்கள் மாதவிடாயைப் பாதிக்கலாம்.
Also Read: மருந்துகளால் ஏற்படும் பக்க விளைவை தடுக்கும் மரபியலுடன் கூடிய அற்புதமான அறிவியல்: Pharmacogenetics!
9. மாதவிடாய் நிற்கும் பருவம் / Perimenopause
பெரும்பாலான பெண்களுக்கு 45-50 வயதிற்குள் மாதவிடாய் நிற்கும் செயல் தொடங்கும். சில பெண்களுக்கு 40 வயது அல்லது அதற்கும் முன்பு கூட தொடங்கலாம். அதனால் தான் 35 வயதுக்குள்ளேயே குழந்தை பெற்றுக்கொள்வது நலம் பயக்கும். குழந்தை பெற்றுக்கொள்வதற்கு ஏற்ற வயது என்ன என்பதை விளக்கி உலக அளவிலான ஆய்வுகள் மூலம் எழுதப்பட்ட ‘பெற்றோரின் வயதும் குழந்தையின் ஆரோக்கியமும்‘ கட்டுரை நமது நியோதமிழ் தளத்தில் பெரும் வரவேற்பை பெற்றது.
மாதவிடாய் நிற்கும் செயல் தொடங்கிவிட்டால் உடல் குறைவான ஈஸ்ட்ரோஜன் ஹார்மோனை உற்பத்தி செய்யும். அதனால் மாதவிடாயில் மாற்றங்கள் ஏற்படுவது இயற்கையே.
10. தைராய்டு பிரச்சினை / Thyroid Problems
தைராய்டு பிரச்சினைகள் போன்ற காரணங்களாலும் மாதவிடாய் தாமதமாகலாம். அப்படி இருந்தால் மருத்துவரை அணுகுங்கள்.
உங்களுக்கு ஒரு சில நாட்கள் மாதவிடாய் தாமதமானால் கவலைப்பட தேவையில்லை. ஆனால் எப்போதுமே மாதவிடாய் முன்போ அல்லது தாமதமாகவோ வந்தால், மாதவிடாய் பல நாட்களுக்கு நீடித்தால் அல்லது மாதவிடாய் சுழற்சியில் வேறு மாற்றங்களும் இருந்தால், உடனடியாக மருத்துவரைச் சந்தித்து ஆலோசனை பெறுங்கள்!
